Pròiseact Loch a’ Mhuilinn

Tha Loch a’ Mhuilinn aig meadhan an àite còmhnaidheach timcheall air Bàgh na Comraich agus tha e na dheagh eisimpleir de loch anns a bheil ìre àrd de mhathachadh air sgàth na th’ ann de dh’aol.  Tha e a’ tabhann àrainn dha caochladh bhiastagan, dealain-dè, eòin agus grunn lusan iongantach, nam measg gnè annasach de dhòbhrach-bhallach. Chan eil riaghladh air an loch an-dràsta agus tha duilgheadasan sònraichte ann ri linn cus fàs cuilce a tha ag adhbhrachadh gu bheil an loch a’ lìonadh le eabar ann an àiteachan.

 

Gabhaidh am pròiseact os làimh sgrùdadh eag-eòlasach den loch agus mu thimcheall agus thèid plana riaghlaidh a dheasachadh is a bhuileachadh airson a luach eag-eòlasach a chumail suas is àrdachadh. Brosnaichidh e cleachdadh airson cur-seachad agus bheir e mìneachadh de a gheòlas, a lusan is ainmhidhean dha muinntir an àite is luchd-tadhail. Tha an loch ri taobh ceum-coise agus tha àite-falaich eòin ann cuideachd. Dheigheadh an loch cuideachd a chur ri prògram nan cuairtean treòraichte a thathas a’ dealbhadh dhan sgìre.