Àrainnean oirthireach agus gnèithean

De na h-àrainnean oirthireach, ‘s e tràighean neo-mhillte na sgìre sa bheil ùidh aig luchd-tadhail. ‘S iad tràighean geala corail Àird Bhàin aig a bheil a’ chudromachd glèidhteachais as motha. ‘S e maothran a chanar ri na ‘cnàimhich’ cailce de lusan coraileach uisgeach a bhuineas do na gnèithean Phymatolithon agus Lithophyllum. Nuair a tha iad beò tha an fheamainn sin a’ cuideachadh le cruthachadh leapannan grunnda dathach a tha a’ toirt taic do eadar-mheasgachadh de bheatha mara. Nuair a tha iad marbh thig na maothrain làn aoil aca gu tìr, agus nuair a ghealaicheas a’ ghrian iad nì iad tràighean àlainn. Far an nochd tràighean maothrain ann an Alba, tha croitearan gan cleachdadh gus an talamh a mhathachadh le cailc. Tha pleoiteachadh malairteach thar-chladaich le leapannan maothrain, far am bithear a’ sgrìobadh a’ ghrunnd, millteach dhan àrainneachd.

 

Chithear ròin chumanta gu tric, nan laighe air eileanan beaga no sgoran nuair a tha an làn a-muigh timcheall costa creagach an rubha, a tha cuideachd a’ cur taic ri àireamh fhallain de bhiastan-dubha cumanta (Lutra lutra).Tha an caolas a-staigh eadar a’ Chomraich is Ratharsaigh tric a’ toirt chothroman gus faicinn mamalan mara nas motha, nam measg pèileagan (Phocoena phocoena),leumadairean srònach (Tursiops  truncatus)agus a’ mhuc-mhara mionc (Balaenoptera acutorostrata), an tè as cumanta den t-seòrsa sin ann an Alba. Ged a dh’fhaodas iad ruighinn 8m ann am fad, ‘s e dìreach boillsgidhean beaga a chithear den druim stuaghach is an ite corranach fad às nuair a nochdas iad gu sealach os cionn an uisge.