Ceàrnaidhean glèidhteachais

Air sgàth a sheallaidhean eireachdail, tha taobh an ear de rubha na Comraich ainmichte mar Earrann Nàiseanta de Bhòidhchead Shònraichte. Tha sreath bheanntan Beinn Bhàin taobh a-staigh seo, seallaidhean a gheibhear bhon Bhealach. Tha an t-àite beanntach seo de bhearraidhean is talamh àrd ainmichte mar Ionad Sònraichte Glèidhteachais agus Ionad de Shuim Shònraichte Shaidheansail. ‘S e Clach-gainmhich Thoirbheartain a th’ anns na creagan ìochdrach agus tha raon de choimhearsnachdan lusan nan àirdean a’ fàs an seo, nam measg fraoch ailpeach is sgairneach searbhaig.

 

‘S e (Racomitrium lanuginosum) cìob aon de lusan samhachail an àite seo. Ann an àiteachan, tha meanbh bhrataichean de dh’aiteann (Juniperus communis)a’ gabhail thairis gu h-àraidh faisg air mullach a’ phrìomh dhruim. ‘S e mòinteach aiteinn Beinn Bhàin an eisimpleir as àirde is as fhada deas den fhàs seo ann an Alba. Tha na h-àrainnean àrda seo a’ toirt taic dha diofar sheòrsaichean bheathaichean a’ gabhail a-steach geàrr mòintich (Lepus timidus), fèidh ruadha (Cervus elaphus),an fheadag bhuidhe (Pluvialis apricaria),an tàrmachan (Lagopus mutus)agus an Iolaire Bhuidhe (Aquila chrysaetos).

 

 Tha am pàirt siarach den rubha a’ toirt taic dha dà làrach de Ghlèidhteachas Nàdair. ‘S iad sin Loch a’ Mhuilinn, uisge a tha fo bhuaidh ìrean mathachaidh nas àirde ri linn gu bheil clach-aoil ann agus Coilltean Abhainn Toscaig, àite le coille dharaich is bheithe.